عكاظ - فتحي حلواني

أنا وأعوذ بالله من كلمة أنا راجل دقة قديمة ما ليا في المراكز ولا في المولات اللي منتشرة في البلد زي العمى على القلب ولا أحب أدخلها من الأساس لأنه نسأل الله السلامة تدخل على أي مول أو مركز تجاري تشوف العجب العجاب شباب بتسريحات شعر غريبة تشوف شعرو تلاقيه أتقل من ملابسه اللي لابسها هدا غير الأساور والسلاسل والبنطلونات والقمصان اللي شكلها مقزز ومقرف ...

 وكله كوم وبعض البنات والحريم كوم وخلوا بالكم من كلمة بعض.. بعض البنات والحريم شالوا برقع الحياء والحشمة والعيب الوحدة منهم تنزل المول بكامل مكياجها وتسريحة شعرها وما تسمع إلا قبقبة الكعب العالي وطرقعة اللبانة، هدا غير انه ما يهمهم تكون العباية مقفلة أو مفتوحة ما تفرق معاهم هدا غير انه العبايات في الزمن ده صارت للفتنة مو للحشمة مزركشة ومخصرة تشوفهم كأنهم في عرض أزياء للعبايات وطرحة الراس ملبوسة للزينة والشعر كله بره تشوفها تقول هيه رايحة لفرح والا لناس يقربولها مو نازلة لسوق، وكل اللي موجودين غريبين عنها، خلاص ماعاد صار في حشمة ولا عيب ولا غيرة، والمصيبة مو هنا المصيبة فين أهلها عنها تركوها تنزل إلى المول أو المركز التجاري بالشكل ده .. بعض الآباء والأمهات والأزواج والإخوان نسأل الله انه يهديهم ويصلحهم يشوف بنته والا ولده أو أخته أو أخوه بالشكل ده وساكت ومعطيها طنااااش ولا كأنو شايف شي ... لكن أنا أبغى أقول لهم شي ترى هدا اللي بتسووه عيب وتقليد أعمى (وتقليد الأعمى يضر)، ما علينا كل مين بعقله يعيش.
نرجع لهرجتنا حق اليوم أنا أحب أنزل على جدة القديمة والشي اللي شفتو هناك يوجع القلب ويفقع المرارة المتعهد اللي ماسك مشروع ترميم أسواق جدة القديمة (شارع قابل وسوق العلوي وسوق البدو وسوق باب مكة وسوق الندى) قال بعظمة لسانه انه يتعهد انه ما يجي رمضان إلا وكل الأسواق اللي ذكرناها حتكون كلها (فل الفل) مرصوفة ومنورة وأنا أقول له بعظمة لساني انت كلمنجي كبيير، الشوارع والأسواق كلها معدومة وماحيخلصوا منها ولا بعد 4 أشهر إلا في حالة وحدة بس ممكن تخلص في شهر إذا كان شغلك يا مقاول (طبطب وليس يطلع كويس) وياكتر المشاريع اللي عندنا من النوع ده في البلد، وأصلا ما ودانا في داهية إلا دي المشاريع اللي بينصرف عليها ملايين الريالات وفي الأخير تطلع فاشوووش .. أصحاب الدكاكين أتبهدلوا من التحفير والتكسير وغبرة التراب بهدلت صحتهم وكلو كووم والصندوق الخشبي اللي معبييين فيه البلاط كوم.. أنا ماني عارف مين هوه هدا الفتك اللي شار عليهم بشورة البلاط المهبب ده، بلاط حجري حالته بالبلا لكن ايش تقول طالما الحكاية كلها أمسك لي واقطع لك، بعدين أنا أبغى أفهم حقون الأمانة والمتعهد ماعرفوا يوقعوا عقد مشروع التحفير والتكسير ده إلا في الأيام هادي وهما عارفين انه هادي الأيام أيام إجازة وبعدها حيجي رمضان وحتكون كل الشوارع مزحومة بالرايح والجي من الأوادم والسيارات، ياليت لو كانوا كبروا مخهم شوية على بال ماتخلص معمعة زحمة رمضان والعيد وبعد كده يشتغلوا زي ما يبغووا وبراحتهم، لكن ايش نقول حقون الأمانة دايما كدا يحبوا (يعكننوا) على الأوادم وعلى أصحاب الدكاكين حتى في أرزاقهم يعني أولاد البلد اللي كانوا يبسطوا ويسترزقوا في الأماكن هادي كل سنة ماحيقدروا يبسطوا هادي السنة وحال المسارات في الأسواق بالشكل ده محفرة ومدهملة وحالتها بالبلا... كنت أتمنى من المجلس البلدي انه يرفض حكاية التحفير والتكسير في أسواق جدة القديمة ويأجل الحكاية دي إليين نهاية دووشة رمضان والعيد، لكن ايش تقول الأمانة تقرر والمقاول يضحك علينا والمجلس البلدي يبصم وأصحاب الدكاكين والبسط ينقطع رزقهم ويروحوا فطيس، لكن ما أقول إلا ربنا يعوضكم من عنده.. وعيشوا كتييييير تشوفوا كتييييير.

التعليقات (0)

RSS خاصية التعليقات